(Sonnet en rouchi, patois de la région de Denain, Nord)

 

L’aut’ jour, j’tos au bistrot pou y déquinte eun’ pinte

Avec mes comarat’s Anatole et Lucas.

Mais i minquot Gaston ; Li, ch’est vraimint eun cas :

Il est toudis in r’tard… Tout d’eun cop, v’là qu’i rinte.

 

In l’ravis’ du coin d’l’eul. Il avot les mains jointes,

I trannot comme un jon’ qu’i’a eu s’certificat.

« J’sus l’pus heureux des homm’s, qu’i disot. J‘ai six cats ! ».

Nous aut’s, in a pinsé qu’i’avot bu trop d’absinthe.

 

Mi aussi, j’ai des cats, des glain’s et des lapins.

J’in fait pas eune histoir’, j’in pale pas aux copains.

Pas d’vant m’télé, j’dis pas qu’ej’ sus eun cinéphile.

 

Pis d’eun cop, j’ai r‘trouvé tout’ em’ lucidité :

Ch’t’homm’-là, il arvénot juss d’el’ maternité ;

Jessica, ch’atot l’nom qu’i’avot donné à s’ file.