Nous v’là arconfinés, ch’a d’vient eune habitute,

Sauf qué ch’fos-chi, in a deux ou tros permissions

Comm’ d’aller s’pourméner sans arcommindation,

À condition, bin sûr, d’pas canger d’latitute.

 

À ch’t’heure, i m’a fallu ed’ nouvell’s’ aptitutes

Pou m’adapter vraimint à chèt’ situation.

Car pou infin rimplir ch’fameusse attestation

J’cros qu’i faut avoir fait dix ou quinze ans d’étutes.

 

Eun’ fos qu’t’as décidé si ch’est pas l’couverr’feu,

J’té donne eun bon consel : prinds t’cayère, assis-te.

Attinds qu’tout cha s’affiche et pis mets tes leunettes

 

Pou lire et pou choisir el’ lign’ qui correspond

(Cha s’ra aussi rapit’ qu’eune glain’ chaqu’ fos qu’ell’ pond).

Jusse après, i’s’ra l’heur’ d’rintrer à t’maisonnette.