J’étos fin installé dins eun salon du lif’
Au mitan d’un villach ‘ qué jé’n’connaissos pas
L’salle étot pas cauffée, mais y’avot pas d’débat :
Êt’ ichi ou ailleurs, pour mi, ch’atot kif kif.

Minme si j’ai payé m’plach’, ch’atot pas un motif
Pour mi d’intrer in guerre ou d’démarrer l’combat,
Pas pus’ qué l’café frod ou l’délicieux repas
Composé d’eun’ tartine avec du corned beef.

Y’a pas eu d’visiteurs, in n’a pas fait l’culbute.
Em’ plaind’ ou m’laminter, ché pas dins m’habitut’,
Mais j’étos à deux dogts ed’ tout abindonner.

À la fin de’l’journée, j’ai r’çu eun’ rud’ sécousse.
J’vous prie dé’m’croire hélas, j’cros bin qu é’j’sus ruiné :
J’ai pas vindu eun lif’, mais j’d’ai aquaté douz’.